अमेरिकाको ओरेगन राज्यस्थित एक प्राथमिक विद्यालयमा भएको गोलीकाण्डमा कम्तीमा पाँच जनाको मृत्यु भएको आशंका गरिएको छ। घटनामा बालबालिकासमेत पीडित भएको प्रहरीले जनाएको छ। एसोसिएटेड प्रेसका अनुसार, अक्टोबर १५ मा बेन्ड सहरस्थित सिल्भर रेल प्राथमिक विद्यालयमा गोलीकाण्ड भएको हो। घटनाबारे दिउँसो १२ बजेर ५९ मिनेटमा सूचना पाएपछि प्रहरी केही मिनेटमै घटनास्थल पुगेको थियो। प्रहरीका अनुसार, विद्यालयबाहिर एउटा गाडीमा गोली प्रहार भएको सूचना आएपछि थप गोली चलेको खबर विद्यालयभित्रबाट आएको थियो। प्रहरी घटनास्थल पुगेलगत्तै संदिग्ध आक्रमणकारी गोली लागेर ढलेका थिए। उनको मृत्यु भएको पुष्टि गरिएको छ। तर, उनलाई कसले गोली हानेको हो भन्ने खुलेको छैन। घटनामा कम्तीमा दुई जनालाई अस्पताल लगिएको छ। उनीहरूको अवस्थाबारे तत्काल जानकारी सार्वजनिक गरिएको छैन। मृत्यु हुनेको संख्या प्रारम्भिक अनुमान भएकाले थप अनुसन्धानसँगै परिवर्तन हुन सक्ने अधिकारीहरूले बताएका छन्। घटनापछि विद्यालय बन्द गरी प्रहरी र उद्धारकर्मीले कक्षाकोठा–कक्षाकोठा जाँच गर्दै विद्यार्थी तथा अन्य व्यक्तिलाई सुरक्षित बाहिर निकाल्ने काम गरेका थिए। घटनाबारे थप अनुसन्धान भइरहेको छ।
