दोहा । कतारमा जारी विश्वकपको समूह ‘सी’अन्तर्गत मंगलबार जारी खेलको दोस्रो हाफमा अर्जेन्टिनाविरुद्ध साउदी अरबले २-१ को अग्रता लिएको छ ।

दोहास्थित लुसेल रंगशालामा साउदीका सले अलशेहेरीले गोल बराबरी गोल फर्काए । फेरेस अलब्रिकानले दिएको पासलाई उनले १८ यार्ड बक्स अगाडिबाट प्रहार गर्दै गोलमा परिणत गरेका हुन्। त्यसको ५ मिनेट नबित्दै सलीन अलदावासरीले अर्को गोल गरे ।

आठौं मिनेटमा लियान्ड्रो पेरेडेसमाथि साउदीका खेलाडीले १८ यार्ड बक्समा फाउल गरेपछि अर्जेन्टिनाले पेनाल्टीबाट अग्रता लिने मौका पाएको थियो। सोही पेनाल्टीको सदुपयोग गर्दै कप्तान लियोनेल मेसीले अग्रता दिलाएका थिए ।

साउदीविरुद्ध १०औं मिनेटमा गोल गरेका मेसी अर्जेन्टिनाबाट विश्वकपमा गोल गर्ने दोस्रो पाको खेलाडी बनेका छन्।

सबैभन्दा पाका खेलाडी मार्टिन पालेर्मो हुन्। उनले सन् २०१० मा दक्षिण अफ्रिकामा भएको विश्वकपमा ग्रीसविरुद्ध ३६ वर्ष र दुई सय २७ दिनमा गोल गरेका थिए।

मेसीले आज ३५ वर्ष र एक सय ५१ दिनमा गोल गरेका हुन्। मेसीले २२औं मिनेटमा गरेको गोल अफसाइडका कारण रद्द भएको थियो।

एसियाली मुलुकमाथि निरन्तर आक्रमणका मौका बनाएको अर्जेन्टिनाका लागि २८औं मिनेटमा लौटारो मार्टिनेजले गरेको गोल पनि अफसाइडकै कारण रद्द भयो।

दक्षिण अमेरिकी महारथीविरुद्ध संघर्षरत साउदीले भने फ्रेममा कुनै प्रहार गर्न सकेन।

source:-onlinekhabar

worldcup

प्रकाशित मिति: मङ्लबार, मंसिर ६, २०७९, ५:३३ बेलुका

लेखक: समाचारपाटी