बागलुङ । बागलुङ बजारको मानव वस्तीमा पसेको चितुवालाई नियन्त्रणमा लिइएको छ। बुधबार बिहान बागलुङ नगरपालिका–३ नागरोडका रामु खड्काको घरमा पसेको चितुवालाई डिभिजन वन कार्यालय बागलुङ र प्रहरीको टोलीले नियन्त्रणमा लिइएको हो। 

खड्का परिवारले चितुवालाई घरभित्रै पसेको देखेपछि प्रहरीलाई खबर गरेका थिए। प्रहरी र डिभिजन वन कार्यालयको टोली उक्त घरमा पुग्दा चितुवा घरको एक कुनामा लुकेर बसेको अवस्थामा भेटिएको डिभिजन वन अधिकृत मुकुन्द अधिकारीले बताउनुभयाे। 

‘बुधबार बिहान ९:३० बजे घरभित्र चितुवा पसेको देखेपछि रामु खड्काले प्रहरीमा खबर गर्नुभएको थियो,’ अधिकृत अधिकारीले भन्नुभयाे, ‘प्रहरीले हामीलाई खबर गरेपछि त्यहाँ पुग्दा चितुवा घरको एक कुनामा लुकेर बसेको थियो।’

अधिकृत अधिकारीले चितुवा घरभित्र पसेपनि कसैलाई आक्रमण नगरेको बताउनुभयाे। उहाँले बिहान उज्यालो भएपछि जंगलबाट गाउँ पसेको चितुवाले सुरक्षित बासस्थानको खोजिमा घरमा पसेको अनुमान गरिएको बताउनुभयाे। 

चितुवालाई डिभिजन वन कार्यालयसँग रहेको सामान्य काठको खोरमा राखेर सुरक्षित तरिकाले घरबाहिर निकालिएको अधिकारीले बताउनुभयाे। उहाँले नियन्त्रणमा लिइएको चितुवा वन कार्यालयको परिसरमा राखिएको र बुधबार साँझ जंगलमा लगेर छोडिने बताउनुभयाे।

चितुवानियन्त्रण

प्रकाशित मिति: बिहिबार, माघ ५, २०७९, १:११ बेलुका

लेखक: समाचारपाटी