विराटनगर । हत्या भएको १६ वर्षपछि प्रहरीले घटनामा संलग्न दुई जनालाई पक्राउ गरेको छ । व्यक्तिको हत्या गरेर शवलाई जंगलमा गाडेको घटनामा संलग्न मिक्लाजुङ गाउँपालिका–१ का ७० वर्षीय देवीप्रसाद राई र ५० वर्षीय धनकुमार राईलाई पक्राउ गरेको जिल्ला प्रहरी कार्यालय मोरङले जनाएको छ ।

देवीप्रसाद मंगलबार र धनकुमार गत शनिबार पक्राउ परेको मोरङ प्रहरीका प्रवक्ता डीएसपी रञ्जनकुमार दाहालले बताउनुभयाे । उहाँका अनुसार दुवै जनालाई गाउँघरमै बसेको अवस्थामा पक्राउ गरिएको हो ।

मिक्लाजुङ–१ ९साविकको रमितेखोला गाविस–४० का ३५ वर्षीय सन्तोष राईको २०६४ जेठ २० गते राति हत्या भएको थियो । सन्तोषको हत्यापछि जंगलमा लगेर शव गाडिएको थियो । सो घटनामा संलग्न दुवैलाई जिल्ला अदालत मोरङले २०६७ सालमा दोषी ठहर गर्दै जनही ५ वर्ष कैद सजाय हुने फैसला गरेको थियो ।

फरार रहेका देवीप्रसाद र धनकुमारलाई पक्राउ गरेर मंगलबार अदालतमा पेस गरिएको डीएसपी दाहालले बताउनुभयाे । अदालतले देवीप्रसाद र धनकुमारलाई कैद सजाय भुक्तानका लागि कारागार चलान गरेको छ ।

पक्राउहत्या

प्रकाशित मिति: बुधबार, मंसिर ६, २०८०, १:२८ बेलुका

लेखक: समाचारपाटी