काठमाडौं । भक्तपुरको चाँगुनारायण नगरपालिका वडा नम्बर ३ झौखेल पिपलबोट नजिकै एक व्यक्तिले कुटपिट गरी श्रीमतीको हत्या गरेका छन् ।

फागुन २४ गते बेलुकी सवा ६ बजे झौखेलमा डेरा गरी बस्ने सिन्धुपाल्चोकको मेलम्ची नगरपालिका वडा नं। ८ घर भएका २५ वर्षीय सन्तोष भुजेलको कुटपिटबाट भुजेलकी २१ वर्षीया श्रीमती पवित्रा राईको मृत्यु भएको हो ।

पवित्राको उपचारको क्रममा भक्तपुर अस्पतालमा फागुन २४ गते बुलुका सवा सात बजे मृत्यु भएको जिल्ला प्रहरी परिसर भक्तपुरका प्रवक्ता बसन्त पाठकले जानकारी दिनुभयाे ।

प्रहरीका अनुसार सन्तोषले मादक पदार्थ सेवन गरी श्रीमती पवित्रालाई कुटपिट गरेकाे प्रहरीले जनाएकाे छ । पवित्राको शव पोष्टमार्टमका लागि भक्तपुर अस्पतालमै राखिएको छ । प्रहरीले सन्तोषलाई नियन्त्रणमा लिएर थप अनुसन्धान गरिरहेको प्रवक्ता पाठकले जानकारी दिनुभयाे ।

भक्तपुर

प्रकाशित मिति: शुक्रबार, फाल्गुन २५, २०८०, १:५३ बेलुका

लेखक: समाचारपाटी