नेपाल टेलिकमले ल्यायो ह्याप्पी लर्निङ प्याक, ५०० रुपैयाँमा ३५ जीबी डेटा–Samacharpati
Samacharpati
मङ्लबार, कार्तिक ११, २०७७
  • होमपेज
  • नेपाल टेलिकमले ल्यायो ह्याप्पी लर्निङ प्याक, ५०० रुपैयाँमा ३५ जीबी डेटा

नेपाल टेलिकमले ल्यायो ह्याप्पी लर्निङ प्याक, ५०० रुपैयाँमा ३५ जीबी डेटा

नेपाल टेलिकमले ल्यायो ह्याप्पी लर्निङ प्याक, ५०० रुपैयाँमा ३५ जीबी डेटा

काठमाडौं । सरकारी स्वामित्वको दूरसञ्चार कम्पनी नेपाल टेलिकमले बुबाको मुख हेर्ने दिनको अवसरमा ह्याप्पी लर्निङ प्याक सार्वजनिक गरेको छ । कम्पनीले कोभिड १९ को महामारीको समयमा विद्यार्थीहरुको पठनपाठनमा सघाउ पुर्याउने उद्देश्यका साथ यो नयाँ प्याक ल्याएको हो ।निकै सस्तो मूल्यमा उपलब्ध हुने यो प्याकेजबाट विद्यालय र विश्वविद्यालयको अनलाइन पठनपाठनमा सहयोग पुग्ने कम्पनीको विश्वास छ । यसअन्तर्गत ३१५ रुपैयाँमा २४ जीबी र ५०० रुपैयाँमा ३५ जीबी डेटा उपलब्ध हुनेछ ।

२४ जीबी डेटामध्ये २० जीबी डेटा जूम, माइक्रोसफ्ट टिम्स र गूगल मीटमा ई–लर्निङ एप्लिकेसन प्रयोग गर्नका लागि र बाँकी चार जीबी डेटा अन्य कुनैपनि एप्लिकेसनमा प्रयोग गर्न सकिनेछ । यसैगरी ३५ जीबीको अर्को प्याकेजमा ३० जीबी डेटा जूम, माइक्रोसफ्ट टिम्स र गूगल मीटमा ई–लर्निङ एप्लिकेसन प्रयोग गर्नका लागि र बाँकी पाँच जीबी डेटा अन्य कुनैपनि एप्लिकेसनमा उपयोग गर्न सकिने छ । यी दुवै प्याकेजको समयावधि २८ दिनको हुनेछ ।

प्याकेज प्रयोग गर्न चाहने सम्बन्धित शैक्षिक संस्थाहरुले आफ्ना शिक्षक र विद्यार्थीहरुको नेपाल टेलिकमको मोबाइल नम्बरसहितको नामावली कम्पनीमा ईमेल पठाउनुपर्नेछ । सिफारिस प्राप्त भएका नम्बरहरुलाई कम्पनीले एसएमएसमार्फत प्याकेज खरिद गर्न सूचना दिनेछ । एसएमएस प्राप्त भएपछि सूचीमा रहेका मोबाइल नम्बरहरुबाट *1441# डायल गरी उपलब्ध दुईमध्ये कुनै एक प्याकेज छनौट गर्न सकिनेछ ।

ह्याप्पी लर्निङ प्याक नेपाल टेलिकमले प्रदान गर्ने जीएसएम मोबाइल (टूजी, थ्रीजी र फोरजी) को डेटा सेवामार्फत प्रयोग गर्न सकिने छ । यो प्याकेज आफूलाई उपयुक्त हुने कुनैपनि समयमा प्रयोग गर्न सकिने छ । विद्यार्थी अफर अन्तर्गत *1600# मा डायल गरी सिम रजिष्ट्रेसन गरेका एसईईका विद्यार्थीहरुले पनि नेपाल टेलिकमको आफ्नो मोबाइलबाट *1441# डायल गरी ह्याप्पी लर्निङ प्याक खरिद गर्न सक्नेछन् ।

नेपाल टेलिकमले उपलब्ध गराएका यी प्याकेजहरुबाट कोभिड महामारीको असहज परिस्थितिमा पनि अनलाइनबाट पठनपाठन गर्न/गराउन विद्यार्थी, अभिभावक तथा शिक्षकलाई थप सहज र मितव्ययी हुने कम्पनीको अपेक्षा छ ।

ट्रेन्डिङ

धेरै कमेन्ट गरिएका