पाल्पा  । पाल्पाको जोर्तेमा पहिरोले स्कारपियो पुरिंदा ३ जनाको मृत्य भएको छ भने ८ जना घाइते भएका छन्। तानसेन तम्घास सहायक राजमार्गको पाल्पा जोर्तेमा ढुङ्गासहितको पहिरोले रेसुङ्गा यातायात प्रा.लि.को  लु १ ज ४६०० नम्बरको स्कारपियो गाडी पुरिंदा ३ जनाको घटनास्थमै मृत्यु भएको जिल्ला प्रहरी कार्यालय पाल्पाका प्रमुख एसपी हेरम्व शर्माले जानकारी दिनुभयाे।  

मृत्यु हुनेमा रेसुङ्गा नगरपालिका वडा नं ७  की ५० वर्षीया मनाकला चुदारा र जिल्ला प्रहरी कार्यालय गुल्मीमा कार्यरत  तानसेन पाल्पाका प्रहरी सहायक हवलदार यमबहादुर गोदार रहेका र एक जना पुरुषको सनाखत हुन बाँकी रहेको जिल्ला प्रहरी कार्यालय पाल्पाका सूचना अधिकारी डिएपी विरेन्द्र थापाले जानकारी दिनुभयाे। 

तम्घासबाट बुटवलतर्फ जाँदै गरेको जीप बिहान करीव सवा ८ बजेको समयमा पाल्पाको जोर्तेमा पहिरोमा पुरिएको हो।  घाइते भएका ८ जनाको लुम्विनी मेडिकल कलेज प्रभासमा उपचार भइरहेको चालक सकुसल रहेको सूचना अधिकारी  थापाले बताउनुभयाे। घाइतेमध्ये एक जनाको बाहेक अन्य ७ जनाको अवस्था समान्य रहेको पाल्पा प्रहरीले जनाएको छ। 

पाल्पास्कारपियो दुर्घटना

प्रकाशित मिति: बुधबार, भदौ १३, २०८०, ११:०६ बिहान

लेखक: समाचारपाटी