स्वदेशी कच्चा पदार्थमा आधारित उद्योग खोलौं : प्रदेश प्रमुख शेरचन – Samacharpati Samacharpati स्वदेशी कच्चा पदार्थमा आधारित उद्योग खोलौं : प्रदेश प्रमुख शेरचन – Samacharpati
Samacharpati
मङ्लबार, फाल्गुन १८, २०७७
  • होमपेज
  • स्वदेशी कच्चा पदार्थमा आधारित उद्योग खोलौं : प्रदेश प्रमुख शेरचन

स्वदेशी कच्चा पदार्थमा आधारित उद्योग खोलौं : प्रदेश प्रमुख शेरचन

स्वदेशी कच्चा पदार्थमा आधारित उद्योग खोलौं : प्रदेश प्रमुख शेरचन

पोखरा, १८ फागुन । गण्डकी प्रदेशका प्रमुख अमिक शेरचनले स्वदेशी कच्चा पदार्थमाआधारित उद्योगको स्थापना गर्नुपर्नेमा जोड दिनुभएको छ । बागलुङ समाज पोखराको १९ औं वार्षिक साधारणसभा तथा १० औं अधिवेशनलाई शनिबार पोखरामा सम्बोधन गर्दै प्रदेश प्रमुख शेरचनले स्वदेशमै उपलब्ध कच्चा पदार्थको अधिकतम उपयोग गरिनुपर्नेमा जोड दिनुभयो ।

“प्रकृतिले दिएका चिजले हामी सम्पन्नशाली छौं”, उहाँले भन्नुभयो, “यी स्रोतहरूको उपयोग गर्न सके मात्रै हामीले आर्थिक समृद्धि हासिल गर्न सक्छौं ।” प्राकृतिक स्रोत, साधनले गण्डकी प्रदेश सम्पन्न रहेको भन्दै प्रदेश प्रमुख शेरचनले प्रकृतिले वरदान दिएको भएपनि मानव जातिले
उपलब्ध स्रोत, साधनको सही उपयोग गर्न नसकेको उल्लेख गर्नुभयो ।

गण्डकी प्रदेशमा थुप्रै खनिज पदार्थ रहेको भन्दै उहाँले खनिजको उत्खनन् गरेर त्यसमै आधारित उद्योगधन्दाको विकासमा जोड दिनुपर्ने आवश्यकता औंल्याउनुभयो । एक अर्को प्रसंगमा उहाँले कुनै पनि समाजको गठन र स्थापनामा व्यक्तिगत अभीष्ट राख्न नहुने बताउनुभयो । स्वच्छ भावनाले समाजसेवाका लागि समाजको गठन हुने गरेको बताउँदै प्रदेश प्रमुख शेरचनले दुःखी, गरिबका लागि समाजले सधैं साथ दिनुपर्ने धारणा राख्नुभयो ।

 

 

गण्डकी प्रदेशसभाका प्रदेश सांसद् कृष्ण थापाले अहिले जनप्रतिनिधिहरू नैतिक पतनको बाटोमा अग्रसर रहेको भन्दै जनताले
आशा गरेका व्यक्तिहरूबाटै निराश हुनुपर्ने अवस्था आउनु दुर्भाग्य भएको बताउनुभयो । त्यस्तै, प्रदेश सांसद् इन्द्रलाल सापकोटाले
राजनैतिक दल सुध्रिए मात्रै देशको समृद्धि सम्भव हुने भन्दै राजनीतिलाई घृणाको विषय नभइ असल संस्कृति निर्माणको जग
बनाउनुपर्ने धारणा व्यक्त गर्नुभयो ।

अर्का प्रदेश सांसद् मणिभद्र शर्मा कँडेलले बागलुङको विकासका लागि पोखरामा बसोबास गर्ने बागलुङेहरूले आ–आफ्नो
ठाउँबाट भूमिका खेल्नुपर्ने बताउँदै समाज भनेको दुःखको साथी बन्नुपर्ने आवश्यकता औंल्याउनुभयो । त्यसैगरी, अर्की प्रदेश सांसद् दिलमाया रोकामगर “दीपा”ले बागलुङ जिल्लाको समृद्धिका लागि जनप्रतिनिधि र समाजका अगुवाहरू मिलेर अघि बढ्नुपर्ने
धारणा राख्नुभयो ।

गण्डकी प्रदेशका मुख्यमन्त्री पृथ्वीसुब्बा गुरुङका प्रमुख राजनैतिक सल्लाहकार गोविन्द नेपालीले समाज दुःखी, गरिबको साथी
बन्नुपर्ने आवश्यकता औंल्याउनुभयो । कार्यक्रममा सम्मानित व्यक्तिहरूको तर्फबाट डा. भानुभक्त शर्मा कँडेल, सल्लाहकार दीर्घप्रसाद पाण्डेलगायतले जिउँदाको जन्ती, मर्दाको मलामीका लागि समाजको गठन भएकाले समाजले दुःख, सुखमा साथ दिनुपर्ने बताउनुभएको थियो ।

सो अवसरमा विभिन्न विषयमा विद्यावारिधि प्राप्त समाजका सदस्यहरू र ज्येष्ठ नागरिकलाई सम्मान गरिएको थियो । बागलुङ समाज पोखराका अध्यक्ष कुलचन्द्र शर्माको अध्यक्षतामा भएको कार्यक्रममा उपाध्यक्ष सुनिल पाण्डे र सचिव डिल्लीप्रसाद शर्माले बोल्नुभएको थियो । कार्यक्रममा समाजको स्मारिका विमोचन गरिएको थियो । साधारणसभाले सचिव डिल्लीप्रसाद शर्माद्वारा प्रस्तुत सचिवको प्रतिवेदन र कोषाध्यक्ष शिवप्रसाद शर्माद्वारा प्रस्तुत कोषाध्यक्षको प्रतिवेदन सुझावसहित सर्वसम्मतिले पारित गरेको छ । समाजको अधिवेशनले नयाँ नेतृत्व चयन गर्नेछ ।

आजको ट्रेन्डिङ समाचार

धेरै कमेन्ट गरिएका