चारवर्षसम्म अलपत्र मुस्ताङ थासाङ ३ र ४ वडा जोड्ने लेते–छ्यो सस्पेन्सन पुलको काम अघि बढ्दै

जोमसोम । चारवर्षसम्म अलपत्र मुस्ताङको थासाङ गाउँपालिका ३ र ४ वडा जोड्ने लेते–छ्यो सस्पेन्सन पुलको काम अहिले द्रुत गतिमा अघि बढाइएको छ।

हिउँदयामको चिसो मौसममासमेत लेते–छ्यो सस्पेन्सन पुलको काम सञ्चालन भइरहेको पूर्वाधार विकास कार्यालय मुस्ताङले जनाएको छ।

२०७४ साल फागुन महिनामा साविक जिविसले लेते–छ्यो जोड्ने मोटरेबल सस्पेन्सन ब्रिजको ठेक्का सम्झौता गरेको थियो। कालिगण्डकी नदीमा निर्माणधीन यो मोटरेबल पुल निर्माणको जिम्मा स्वच्छन्द निर्माण सेवाले लिएको थियो।

कालिगण्डकी वारीपारी गरी एक सय मिटर लम्बाइ र ७ दशमलव २ मिटर चौडाइ रहेको यसको लागत ११ करोड ३० लाख रहेको थियो। सुरुवाती ठेक्का सम्झौता हुँदा पुल निर्माणको काम १८ महिनामा सकिनु पर्ने थियो। तर, थासाङ गाउँपालिका ३ र ५ जोड्ने लेते—कुञ्जो सस्पेन्सन मोटरेबल तत्कालीन समयमा प्राविधिकले गरेको डिजाइन फेल भएको भन्दै ४ वर्षसम्म पुल निर्माण अन्योल बनेको थियो। २०७५ सालको भदौ महिनामा कालिगण्डकी नदीको बाढीले पुलको फाउन्डेसन बीममा क्षति पुर्याएपछि निर्माणधीन पुलको संरचना जोखिममा परेको थियो।

कालिगण्डकी नदीको कटानले पुलको बीममा क्षति पूर्याउँदा पुलको १५ प्रतिशत भौतिक प्रगति थियो। त्यसपछि निर्माणको काम रोकिएको थियो। निर्माण कम्पनीले पुलको दायाँबायाँ दुईवटा टावर फाउन्डेसन ढलानको आशिंक काम गरेको थियो।

निर्माणाधीन अवस्थामा रहँदा भौतिक पुर्वाधार विकास मन्त्रालयले २०७७ भदौमा उक्त पुल निर्माणको अख्तियारी प्रदेश सरकारअन्तर्गत पूर्वाधार विकास कार्यालयलाई जिम्मा दिएको थियो। लामो समयदेखि काम रोकिएको लेते—कुञ्जो मोटरेबल पुलको काम भइरहेको पूर्वाधार विकास कार्यालय मुस्ताङका प्रमुख विवेक सिग्देलले जानकारी दिनुभएकाे छ।

मुस्ताङ थासाङ