Samacharpati
बुधबार, फाल्गुन ७, २०७६
  • होमपेज
  • प्रदूषण हुनबाट रोक्ने उद्देश्यले  घोराही उपमहानगरपालिकाद्वारा प्लाष्टिक बिक्रीको तयारी

प्रदूषण हुनबाट रोक्ने उद्देश्यले  घोराही उपमहानगरपालिकाद्वारा प्लाष्टिक बिक्रीको तयारी

  • रासस
  • बुधबार, मंसिर २५, २०७६
प्रदूषण हुनबाट रोक्ने उद्देश्यले  घोराही उपमहानगरपालिकाद्वारा प्लाष्टिक बिक्रीको तयारी

घोराही, २५ मङ्सिर । घोराही बजारलाई वातावरणीयरूपमा प्रदूषण हुनबाट रोक्ने उद्देश्यले उपमहानगरपालिकाले प्लाष्टिक बिक्री गर्ने भएको छ । जथाभावीरूपमा फोहर फाल्दा शहरमा प्रदूषण बढ्ने र ल्याण्डफिलसाइटसमेत भरिने भएकाले घोराही उपमहानगरपालिकाले नगल्ने फोहरका रूपमा रहेका प्लाष्टिकजन्य वस्तु खरीद गरेर बिक्री गर्ने तयारी गरेको हो । पुनःप्रयोग गर्न सकिने प्लाष्टिक झोला, विभिन्न खाद्यवस्तुका खोललगायतका प्लाष्टिकजन्य वस्तु खरीद गर्नका लागि उपमहानगरपालिकाले यो आर्थिक वर्ष रु सात लाख बजेट छुट्याएको छ । सोही रकमबाट उपमहानगरपालिकाले पहिलोपटक शहरी क्षेत्र वडा नं १४ र १५ सँगै शहरी क्षेत्रका रूपमा विकास हुँदै गरेका वडा नं १०, १३, १६ र १७ लगायतका वडाबाट प्लाष्टिकजन्य वस्तु खरीद गर्ने तयारी गरेको उपमहानगरपालिकाका सरसफाइ व्यवस्थापन शाखाका प्रमुख प्रेम केसीले जानकारी दिनुभयो ।

प्लाष्टिकजन्य पदार्थ उपमहानगरपालिकाले किन्ने भएकाले घरबाट बाहिर नफाल्न उपभोक्तालाई आग्रह गरेको छ । त्यसका लागि अहिले कार्यविधि बनाउने काम भइरहेकाले कार्यविधि बनेपछि प्लाष्टिक खरीदको कामलाई अघि बढाइने उहाँले बताउनुभयो । “पहिलोपटक कुन–कुन वडाको कहाँबाट प्लाष्टिक खरीद गर्ने भनेर कार्यविधि बनाउँदैछौँ”, केसीले भन्नुभयो, “कार्यविधि बनाएपछि प्लाष्टिक खरीदलाई अघि बढाइनेछ ।” उहाँका अनुसार उपमहानगरपालिकाले वडामा रहेका टोल विकास संस्था, सामुदायिक वन, युवा क्लबलगायतका सङ्घसस्थामार्फत प्लाष्टिक खरीद गर्ने तयारी गरेको छ । सङ्घसंस्थामार्फत खरीद गर्दा सरसफाइको अभियानलाई प्रभावकारी बनाउन सकिने र सङ्कलनमा सहज हुने देखिएको उहाँले बताउनुभयो ।

“घोराही बजारसँगै शहरोन्मुख वडामा बढ्दै गरेको फोहर कम गर्नका लागि प्लाष्टिक खरीद गर्ने योजनामा छौँ”, उहाँले भन्नुभयो, “जसले घोराहीलाई प्रदूषण हुनबाट रोक्नका साथै वडा नं १६ मा रहेको डम्पिङसाइटको आयुसमेत बढाउनेछ ।” गल्ने फोहरबाट ग्यास उत्पादन गर्ने र नगल्ने फोहरका रूपमा रहेको प्लाष्टिकलाई खरीद गरेर बिक्री गर्नसके फोहर व्यवस्थापनमा समेत सहजता हुने शाखा प्रमुख केसीले बताउनुभयो । प्लाष्टिकजन्य पदार्थलाई उपमहानगरपालिका आफूले बिक्री गर्ने भएको छ । त्यसका लागि हेटौँडामा रहेको प्लाष्टिक उद्योगसँग कुरा भइरहेको उहाँले बताउनुभयो । अहिले उपमहानगरपालिकामा दैनिक २३ टनसम्म फोहर सङ्कलन हुँदै आएको छ ।

तपाइको प्रतिक्रिया दिनुहोस्

Your email address will not be published. Required fields are marked *

हामी तपाईंको इमेल अरू कसैसँग साझा गर्दैनौं।

ट्रेन्डिङ

सम्बन्धित खवर

धेरै कमेन्ट गरिएका