Samacharpati
बुधबार, असार २४, २०७७
  • होमपेज
  • जङ्गली जनावरबाट हुने क्षतिले कृषक चिन्तित

जङ्गली जनावरबाट हुने क्षतिले कृषक चिन्तित

  • रासस
  • मङ्लबार, कार्तिक १९, २०७६
जङ्गली जनावरबाट हुने क्षतिले कृषक चिन्तित

सोलुखुम्बु, १९ कात्तिक  । जङ्गली जनावरले खेतीबाली नष्ट गरेपछि जिल्लाको सोताङ गाउँपालिका–१ का कृषकले क्षतिपूर्तिको माग गरेका छन् । साविक पावै–९ का हुलु, कुवापानी क्षेत्रमा किसानले लगाएको अन्नबाली जङ्गली जनवारले नष्ट गरेको भन्दै राहतको मागसहित वडा कार्यालयमा निवेदन दिएका छन् । जङ्गलबाट आएका बाँदर, दुम्सी, घोरल र मृगले धान, मकै, कोदो, फापर, केरालगायतका बाली सखाप पारेको कृषक मेगबहादुर राईले गुनासो गर्नुभयो । आम्दानीको मुख्य स्रोत नै कृषि भए पनि भित्र्याउनै नपाइ सखाप पारिदिएको भन्दै उनीहरुले वडा कार्यालयमार्फत स्थानीय सरकार र डिभिजन वन कार्यालयले राहतको व्यवस्था गर्नुपर्ने माग गरेका हुन् ।

करीब ४० घरधुरी रहेको उक्त क्षेत्रका स्थानीयवासीले दिउँसो अन्नबालीको रेखदेख गरे पनि राति क्षति पुर्याउने गरेको बताउँछन् । जङ्गली जनवारको रेखदेख गर्नका लागि बालबालिकासमेत प्रयोग गर्ने गरिएको छ । घरका अन्य सदस्य व्यस्त बन्दा बालबालिकालाई खेतबारीमा लगाउने गर्दा पढाइ नै प्रभावित बनेको स्थानीयवासी मेगबहादुर राईको भनाइ छ । कठिन परिश्रम र मिहेनतका साथ लगाएको खेतीबाली पाक्ने बेलै नभई खान थालेपछि खाद्यान्न सङ्कट हुने चिन्ताले स्थानीयवासीलाई सताउन थालेको छ ।

आम्दानीको स्रोत नभएकाले बिहान–बेलुका छाक टार्नका लागि समेत ज्याला–मजदुरीमा हिँड्नुपर्ने बाध्यता भएको उहाँहरुको गुनासो छ । यस्तै वडा नं १ का वडाध्यक्ष जङ्गबहादुर गुरुङले वडा कार्यालयमा निवेदन आएकाले राहतका लागि गाउँपालिका र वन कार्यालयसँग छलफल गर्ने आश्वासन दिनुभएको छ । वडाका कृषक जङ्गली जनावरपीडित भएकाले उचित क्षतिपूर्तिका लागि आफू लागिपर्ने उहाँको भनाइ छ । खेतबारी बाँझो हुनेक्रम बढ्यो पछिल्लो समय जिल्लाका विभिन्न क्षेत्रमा जङ्गली जनवारको बिगबिगी बढेसँगै कृषक चिन्तित बनेका छन् भने अधिकांश खेतबारीसमेत बाँझो बन्न थालेको छ ।

एकतिर युवाशक्ति वैदेशिक रोजगारीमा जानु र अर्कातिर जङ्गली जनवारले खाइदिने गर्दा राज्यको नीतिअनुसार नतिजा आउन नसकेको बताइन्छ । कृषिमा अनुदान दिइने तर बालिनालीमा क्षति पुगेअनुसारको पर्याप्त राहत एवं क्षतिपूर्तिको व्यवस्था नहुँदा कृषकको आकर्षण अन्यत्र जान थालेको स्थानीयवासी हेमबहादुर राईको भनाइ छ । यतिबेला धान झुल्ने खेत र कोदो पाक्ने बारी बाँझो हुने क्रम बढेको थुलुङदूधकोशी–८ का कार्यवाहक वडाध्यक्ष तीलबहादुर राईले बताउनुभयो । वडाभित्र क्रमैसँग जग्गा बाँझो हुने क्रम बढेपछि आधुनिक खेतीतर्फ आकर्षित गर्न अनुदान तथा सामूहिक खेती प्रणाली अपनाएको राईको भनाइ छ ।

तपाइको प्रतिक्रिया दिनुहोस्

Your email address will not be published. Required fields are marked *

हामी तपाईंको इमेल अरू कसैसँग साझा गर्दैनौं।

ट्रेन्डिङ

धेरै कमेन्ट गरिएका