स्याङ्जाको पुतलीबजार नगरपालिका–४, बरबोटमा मगर भाषा कक्षा सुरु

स्याङ्जा, २१ वैशाख । स्याङ्जा जिल्लाको पुतलीबजार नगरपालिका वडा नं. ४, बरबोटमा १० दिने मगर भाषा कक्षा अभिमुखीकरण कार्यक्रम सुरु भएको छ ।

शुक्रबारदेखि सुरु भाषा कक्षा अभिमुखीकरणको उद्घाटन गर्दै वडाध्यक्ष ओमबहादुर खड्काले आफ्नो जातीय मातृभाषाप्रति गर्व गर्नुपर्ने धारणा व्यक्त गर्नुभयो । वडाले कुनै पनि लक्षित वर्गलाई नछुटाइकन बजेट विनियोजन गरेको भन्दै वडाध्यक्ष खड्काले यसपाली मगर भाषा संरक्षणमा कम बजेट भएपनि आगामी वर्षदेखि आवश्यकता हेरी बजेट बढाउन सकिने भनाइ राख्नुभयो । थोरै बजेट भएपनि सदुपयोग गर्न आग्रह गर्दै वडाध्यक्ष खड्काले आगामी वर्षमा माग गरेको खण्डमा कार्यक्रमको आवश्यकता हेरेर बजेट वृद्धि गर्न सक्ने बताउनुभयो ।

वडा सदस्य डोलराज गौतमले वडाभित्र रहेको एक मात्र आदिवासी जनजाति समुदाय मगर भएको भन्दै मगरको पहिचान संरक्षण गर्न वडाले सहयोग गर्ने प्रतिबद्धता व्यक्त गर्नुभयो । मगर भाषा प्रशिक्षक रूद्रबहादुर श्रीसमगरले लोपोन्मुख हुँदै गएको मगर भाषाको संरक्षणका लागि वडाले देखाएको चासोप्रति धन्यवाद व्यक्त गर्दै सम्बन्धित सरोकारवाला समुदाय पनि भाषा संरक्षणका लागि उत्तिकै सचेत हुनुपर्नेमा जोड दिनुभयो ।

१० दिनसम्म चल्ने मगर भाषा कक्षामा प्रशिक्षक श्रीसमगरले प्रशिक्षण दिनुहुनेछ । पुतलीबजार नगरपालिकाको वडा नं. ४ मा जम्मा १५ घरधुरी मात्र मगर जातिको बसोबास रहेको छ । जसमा पूराना पुस्ताले मगर भाषा बोल्न जानेपनि नयाँ पुस्ताका कसैले पनि मगर भाषा बोल्न जान्दैनन् । बरबोट मगर समूहकी अध्यक्ष निर्मला रानामगरको अध्यक्षतामा भएको कार्यक्रमको सञ्चालन कुमार थापामगरले गर्नुभएको थियो ।

तपाइँले पनि आफ्नो लेख रचना अनि समाचार पठाउन सक्नुहुन्छ : त्यसको लागि [email protected] मा हामीलाई इमेल गर्नुहोस। धन्यबाद ।

scroll to top