विस्थापित बस्तीमा खानेपानीको अभाव

गोरखा, ९ फागुन ।  गोरखा नगरपालिका–६ सिमलचौरको विस्थापित बस्तीमा खानेपानीको अभाव भएको छ । भूकम्पपछि जोखिममा परी केरौजाबाट विस्थापित भएर आएका भूकम्पपीडितको बस्तीमा खानेपानीको अभाव भएको हो । उक्त बस्तीका बासिन्दालाई अहिले एक गाग्री पानीका लागि एक घण्टाभन्दा बढी समय कुर्नुपर्ने बाध्यता रहेको सिमलचौरीका कान्छी गुरुङले जानकारी दिनुभयो । “पानीका लागि वरिपरि सार्वजनिक मूल छैन, उहाँले भन्नुभयो, “अलि नजिक रहेको खेतको मूलमा पानी लिन जाँदा खेतको धनीले सधैँ भोलिबाट नआउनु भन्नुहुन्छ ।” त्यहाँ पनि एक ग्रागी पानी भर्न मात्रै एक घण्टाभन्दा बढी समय लाग्ने गरेको उहाँले बताउनुभयो । 

केरौजामा घर बनाउने ठाउँसमेत नरहेपछि २०७४ सालमा यहाँ आइपुगेका विस्थापित भूकम्पपीडितलाई अहिले दिनभरि भने के खाने, के पिउने भन्ने चिन्ता हुने गरेको गुरुङको भनाइ छ । खानेपानीका लागि सहयोग गरिदिन आफूहरुले नगरपालिकासँग पटक पटक आग्रह गरे पनि सुनुवाइ नभएको गुरुङले गुनासो गर्नुभयो । 

खानेपानीको अभाव भएपछि सिमलचौरका बासिन्दाको पानीको मुहान खोजीमा दिन बित्न थालेको छ । “हामीलाई पानीको मुहान र पाइप मात्र कसैले दिए पनि पुग्थ्यो, स्थानीय काजीराम गुरुङले भन्नुभयो, “बरु अरु जति काम गर्न परे पनि हामी आफैँ दुःख गरेर भए पनि गरथ्यौँ । “गुरुङले अन्नपात बरु ऋण खोजेर भए पनि किन्न जाँदा सजिलो हुने तर पानी नहुदा भने साह्रै नै हैरानी हुने गरेको बताउनुभयो । 

नगरपालिकालाई पनि धेरै पटक पटक भनिसकेका छौ, गुरुङले भन्नुभयो, “सर्भे गर्न पठाउँछौँ भन्नुहुन्छ तर अहिलेसम्म कोही पनि बुझ्न आएको छैन ।” विस्थापित बस्तीमा खानेपानीसँगै बिजुलीको पनि समस्या भएको उहाँहरुको भनाइ छ ।  सिमलचौरमा बसेबास शुरु गरेको डेढ वर्ष हँुदा पनि नगरपालिकाको छेउमा पनि बिजुली र खानेपानीको दुःख भोग्नुपर्दा आफ्नो पुरानो बस्तीको सम्झना आउने उहाँ बताउनुहुन्छ ।

“त्यही सबै कुरा थियो चिनेजानेका सबै हुन्थेँ, खेतीपातीबाट थोरै भए पनि आफ्नै बारीमा उब्जनी हुन्थ्यो, गुरुङले भन्नुभयो, “यहाँ हामीलाई न कसैले सहयोग गर्छन् न हाम्रो समस्या बुझिदिन्छन् नत हाम्रो कुरा नै कसैले सुन्छन्, त्यति पहिरोको पिर छैन भन्ने मात्र हो । उत्तरी गोरखाका केरौजा, सामालगायतका जोखिमपूर्ण बस्तीबाट २२ भन्दा बढी विस्थापित परिवार सिमलचौरमा आएर बसेका छन् । 

रासस

तपाइँले पनि आफ्नो लेख रचना अनि समाचार पठाउन सक्नुहुन्छ : त्यसको लागि [email protected] मा हामीलाई इमेल गर्नुहोस। धन्यबाद ।

scroll to top