काठमाडौं । नेपाली काँग्रेसका सांसद विनोद चौधरीले प्रतिनिधि सभा बाट पारित भएको बजेटले जनताको अपेक्षालाई पूरा गर्नुपर्ने बताउनुभएको छ । 

बुधवार प्रतिनिधिसभाले बजेट पारित गरेसँगै सञ्चारकर्मीसँग कुराकानी गर्दै सांसद चौधरीले बजेटले जनताको अपेक्षालाई पूरा गर्नुपर्ने बताउनुभएको हो । उहाँले विनियोजन भएको बजेटलाई सम्बन्धित निकायले पूर्ण रुपमा सदुपयोग गर्नुपर्ने बताउनु भयो । उहाँले मन्त्रालयहरुले बजेट खर्च गर्न सक्नुपर्ने पनि बताउनु भयो । उहाँले पुँजिगत खर्चलाई प्रभावकारी रुपमा कार्यान्वयन गर्न सरकारले ठोस कदमहरु चालेको पनि बताउनु भयो । 

उहाँले भन्नुभयो – ‘देशको विकास खाली बजेटको माध्यमबाट मात्रै हुँदैन । मोनिटरी पोलिसीदेखि लिएर विभिन्न मन्त्रालयहरुले आफुलाई कसरी सञ्चालन गर्छन्  । विकास निर्माणको काममा कसरी आफूलाई उभ्याउँछन् । अहिलेसम्मको पृष्ठभुमि विकास खर्चमा विनियोजित पैसा हामीले दुई तिहाई खर्च गर्न सकेका छैनौँ । कति पैसा कुन प्रोजेक्टमा लगाउनु जरुरी छ कि लगाएको पैसालाई सदुपयोग गरिकन पूर्ण रुपमा त्यसलाई कार्यान्वयनमा लिएर जानु जरुरी छ । बजेटले अर्थतन्त्रलाई कसरी बढाउने ? पुँजिगत खर्चलाई कसरी कार्यान्वयनमा लिएर जाने प्रभावकारी रुपबाट । त्यसका लागि केही ठोस कदमहरु चाल्ने प्रयास गरेको तपाई हामी सबैले देखेका छौँ । त्यसले निर्णायक भुमिका खेल्न सक्छ कि सक्दैन ? अर्थ मन्त्रालयले मात्रै खेल्दैमा त्यो पुरा हुन्छ कि हुँदैन ? मन्त्रालयगत रुपमा हुने कामहरु गराउने तरिका के हो ? अबको जिम्मेवारी भनेको यो बजेटले जनताको अपेक्षालाई पुरा गर्नुपर्छ । कार्यान्वयनमा लिएर जानुपर्छ । मानिसमा अब केही हुन्छ भन्ने विश्वास दिलाउनुपर्छ ।’ 

विनोद चौधरी

प्रकाशित मिति: बुधबार, असार १३, २०८०, ८:३९ बेलुका

लेखक: समाचारपाटी