सिमरा । बारामा एसईई परीक्षा सुरु भएको पहिलो दिन नै प्रश्नपत्र बाहिरिएको छ । आदर्शकोतवाल गाउँपालिका १ च्युटाहास्थित रामचरित्र माध्यमिक विद्यालय जयनगर परीक्षा  केन्द्रबाट अंग्रेजी विषयको प्रश्नपत्र बाहिरिएको हो । 

परीक्षा  सुरू भएको १५ मिनेटमै परीक्षार्थी पवन साहले मोबाइलबाट फोटो खिचेर ह्वाटस्अप ग्रुपमा प्रश्नपत्रको फोटो पठाउनुभएकाे थियाे । परीक्षा  केन्द्र बाहिर रहेका व्यक्तिलाई प्रश्नपत्र पठाएको करिब ३० मिनेटपछि प्रहरीले जानकारी पाएको थियो । 

जनता माध्यमिक विद्यालय कचोर्वाका परीक्षार्थी साहले प्रश्नपत्रको फोटो बाहिर रहेका दीपक साहलाई पठाउनुभएकाे थियाे । ह्वाट्सअप ग्रुपमार्फत् फोटो बाहिरएपछि परीक्षा  केन्द्रमा प्रश्नपत्र हेर्न भीड् समेत लागेको थियो । मोबाइलमा प्रश्नपत्र हेर्न जम्मा भएपछि प्रहरीले दीपकलाई नियन्त्रणमा लिएको बाराका प्रहरी उपरीक्षक होबिन्द्र बोगटीले बताउनुभयाे । 

‘परीक्षा  केन्द्र बाहिर मोबाइल हेर्न सबै झुम्मिएपछि शंका लागेर प्रहरीले बुझ्ने क्रममा प्रश्नपत्र बाहिरिएको जानकारी पायौं, प्रहरी उपरीक्षक बोगटीले भन्नुभयाे, ‘तत्कालै परीक्षार्थी र दीपकलाई मोबाइलसहित नियन्त्रणमा लियौं।'

प्रहरीले दीपकलाई अझै नियन्त्रणमा राखेको छ भने परीक्षार्थी साहलाई रिहा गरेको छ । प्रहरी उपरीक्षक बोगटीका अनुसार परीक्षार्थी साहको पहिलो दिनको परीक्षा रद्ध गर्ने निर्णय गर्दै उहाँलाई छाडिएको र दीपकलाई कारबाहीका लागि मुद्धा प्रक्रिया अघि बढाउन लागिएको बताउनुभयाे । 

प्रहरी उपरीक्षक बोगटीले परीक्षा रद्ध गर्नुपर्ने स्थिति नरहेको उहाँले बताउनुभयाे । उहाँका अनुसार प्रश्नपत्र बाहिरिए पनि उक्त ग्रुपमार्फत् उत्तरभित्र गएको देखिदैन । परीक्षार्थीको मोबाइल र सामाजिक संजालको ग्रुपमा उत्तर गएको नदेखेपछि परीक्षा रद्ध गर्नुपर्ने अवस्थामा नरहेको बोगटीको भनाइ छ । 

प्रहरीले परीक्षार्थी पवन र दीपकसँग मोबाइल नियन्त्रणमा लिएर ग्रुपमा रहेका सबैको विषयमा जानकारी समेत लिएको थियो । १० जनाको ग्रुपमा तीनजना परीक्षार्थी र सातजना बाहिरका व्यक्ति थिए । तीनजना परीक्षार्थीमध्ये एकजना पवन रहेकाे र अन्य दुई अन्य परीक्षा केन्द्रका विद्यार्थी रहेकाे प्रहरीले जनाएकाे छ । 

प्रश्नपत्र बाहिरिएको घटना सार्वजनिक भएलगत्तै बाराका प्रमुख जिल्ला अधिकारी नवराज सापकोटासहित सुरक्षा निकाय, शिक्षा समन्वय इकाइ कार्यालयको टोली परीक्षा केन्द्र पुग्नुभएकाे थियाे । प्रजिअ सापकोटाको नेतृत्वमा पुगेको टोलीले घटनाको विषयमा जानकारी लिँदै उक्त परीक्षा केन्द्रमा खटिएका केन्द्राध्यक्षसहित पाँचजनालाई  निलम्बन गर्ने निर्णय गरेको छ । 

परीक्षा केन्द्रबाट निलम्बित हुनेमा केन्द्राध्यक्ष दिनेशप्रसाद साह, सहायक केन्द्राध्यक्ष पद्मराज चौधरी, बिजयप्रसाद चौधरी, निरीक्षक कुन्दनप्रसाद कुशवाहा र श्यामकिशोर गुप्ता रहेका प्रहरीले जनाएकाे छ । प्रमुख जिल्ला अधिकारीको नेतृत्वमा परीक्षा केन्द्रमै बसेको बैठकले उनीहरूलाई एसईई परीक्षा अवधिभरीका लागि निलम्बन गरेको हो । 

बाराका प्रमुख जिल्ला अधिकारी सापकोटाले उक्त परीक्षा केन्द्रमा अन्य केन्द्राध्यक्ष, सहकेन्द्राध्यक्ष र निरीक्षक पठाइने बताउनुभयाे । परीक्षालाई मर्यादित बनाउन जिम्मेवारी दिइएका व्यक्तिको लापरवाही देखिएपछि उनीहररूलाई तत्काल निलम्बन गरिएको प्रजिअ सापकोटाको भनाइ छ । 

annapurnapost

एसईई परीक्षानिलम्बित

प्रकाशित मिति: शुक्रबार, चैत्र १७, २०७९, ३:४६ बेलुका

लेखक: समाचारपाटी