लमजुङको बेसीसहरस्थित ठाडोलाइनमा कित्ली बम फेला

लमजुङ, २ मङ्सिर । लमजुङको बेंसीसहरस्थित ठाडोलाइनमा शनिबार बिहान कित्ली बम फेला परेको छ । नेपाली सेनाको बम डिष्पोजल टोलीले उक्त बम निष्क्रिय पारेको छ ।

मर्स्याङ्दी पारी बाँझखेत जाने बाटो, लमजुङ जिल्ला सामुदायिक अस्पतालको गेट नजिकै चाउचाउको कार्टुनभित्र राखिएको कित्ली बमलाई नेपाली सेनाको डिष्फोजल टोलीले शनिबार बिहान साढे १० बजेतिर निष्क्रिय गरेको हो । सेनाका अनुसार कित्लिभित्र बालुवा राखेर बालुवाभित्र सुतली राखेर बनाइएको बमलाई २ पटकको प्रयासमा निष्क्रिय पार्न सफल भएको हो । प्रमुख जिल्ला अधिकारी युवराज मैनालीले उक्त बम सेनाले निष्क्रिय पारेको पुष्टि गरे ।

स्थानीयका अनुसार चाउचाउको कार्टुनभित्र कित्लीजस्तो देखिने वस्तु देखिएपछि प्रहरीमा खबर गरिएको थियो । बिहान करीब ७ बजेतिर फोहरसँगै उक्त बस्तु देखिएको थियो । उक्त बम कांग्रेस पार्टी कार्यालयबाट करीब ५०/६० मिटरको दुरीमा पर्छ । उक्त क्षेत्र वरपर सरकारी कार्यालय पनि रहेका छन् । अन्य ठाउँमा पनि बम हुनसक्ने भन्दै सेना, सशस्त्र प्रहरी र नेपाल प्रहरीले खोजी गरेको छ । शनिबार बिहान साढे ६ बजेतिरमात्रै बाँझखेतको आँपचौर जंगलमा बम पड्काएको आवाज सुनिएको प्रहरीले बताएको छ ।

लमजुङको बेंसीसहरमा शनिबार हुने कांग्रेसको आमसभालाई प्रभावित बनाउन बम पड्काएको र राखिएको हुनसक्ने कांग्रेस नेता कार्यकर्ताले बताएका छन् । सुरक्षा निकायले भने नेत्रविक्रम चन्द नेतृत्वको माओवादीले बम पड्काएको हुनसक्ने आंकलन गरेका छन् ।

 

तपाईं हामीसंग फेसबुकट्वीटर मार्फत पनि जोडिन सक्नुहुन्छ । फेसबुक र ट्वीटरमा जोडिएर चाडो समाचार पाउनुहोस् । समाचार तथा लेख रचना पठाउनु परेमा sa[email protected] मा पठाउनुहोला ।

प्रतिक्रिया लेख्नुहोस
सम्बन्धित